ఆంధ్రప్రదేశ్ రాజకీయాల్లో కీలక పరిణామం చోటు చేసుకుంది. మాజీ ఆంధ్రప్రదేశ్ కాంగ్రెస్ కమిటీ (ఏపీ పీసీసీ) అధ్యక్షుడు సాకే శైలజానాథ్ వైఎస్ఆర్ కాంగ్రెస్ పార్టీలో చేరారు. ముఖ్యంగా 2024 ఎన్నికల్లో వైఎస్ఆర్ కాంగ్రెస్ పార్టీ ఘోర పరాజయం పాలై, ప్రధాన ప్రతిపక్ష హోదా కోల్పోయిన పరిస్థితిలో ఆయన ఈ నిర్ణయం తీసుకోవడం ప్రాధాన్యత సంతరించుకుంది. టీడీపీ-జనసేన-బీజేపీ కూటమి 175 స్థానాల్లో 164 సీట్లు గెలుచుకుని అధికారంలోకి వచ్చిన నేపథ్యంలో శైలజానాథ్ వైఎస్ఆర్సీపీలో చేరటం రాజకీయంగా చర్చనీయాంశంగా మారింది.
అరుదైన రాజకీయ పరిణామం
సాధారణంగా అధికారంలో ఉన్న పార్టీలో చేరేందుకు రాజకీయ నేతలు ఆసక్తి చూపిస్తారు. కానీ ప్రతిపక్షంలో ఉన్న పార్టీలో చేరడం చాలా అరుదైన ఘటన. ఇది గతంలో బొత్స సత్యనారాయణ చేరికను గుర్తుకు తెస్తుంది. 2014లో టీడీపీ-బీజేపీ కూటమి గెలిచి అధికారంలోకి వచ్చినప్పటికీ, బొత్స సత్యనారాయణ 2015లో అధికారంలో లేని వైఎస్ఆర్సీపీలో చేరారు. ఇప్పుడు అదే మార్గంలో శైలజానాథ్ వైఎస్ఆర్సీపీలో చేరడం విశేషం.
శైలాజానాథ్ రాజకీయ ప్రస్థానం
- 2004లో తొలిసారి ఎమ్మెల్యేగా గెలిచి, వైఎస్ రాజశేఖర రెడ్డి హయాంలో ప్రభుత్వ విప్‌గా పని చేశారు.
- 2009లో మళ్లీ ఎమ్మెల్యేగా గెలిచి రాష్ట్ర మంత్రిగా బాధ్యతలు నిర్వహించారు.
- ఆంధ్ర-తెలంగాణ విభజన సమయంలో సీమాంధ్ర కాంగ్రెస్ పార్టీ ఎమ్మెల్యేల కన్వీనర్‌గా కీలక భూమిక పోషించారు.
- 2020-2022 మధ్య ఏపీ పీసీసీ అధ్యక్షుడిగా సేవలందించారు.
వైఎస్ఆర్సీపీలో చేరిన శైలజానాథ్ పార్టీకి కొత్త ఉత్సాహాన్ని, నాయకత్వ బలాన్ని అందించనున్నారు. రాబోయే రోజుల్లో పార్టీ పునర్నిర్మాణంలో, భవిష్యత్ వ్యూహాల్లో ఆయన కీలక పాత్ర పోషించే అవకాశం ఉంది.
Also read:
https://voiceofandhra.org/telugu/2025/02/06/nda-vs-ysrcp-first-8-months-governance-differences/
